Gwybodaeth a chyngor am gyllid ar gael ar gyfer busnesau twristiaeth

Cymerwch y cam nesaf tuag at croeso mwy hygyrch - cynllun hygyrchedd newydd i fusnesau twristiaeth a lletygarwch yng Nghymru.

Mae Croeso i Bawb yn gynllun cronfa gyfalaf newydd sydd yn

• cefnogi busnesau twristiaeth a lletygarwch i greu amgylcheddau ymwelwyr mwy hygyrch a chynhwysol. 
• ariannu gwelliannau ffisegol sy'n dileu rhwystrau ac yn gwneud ymweliadau yn haws i bobl ag ystod eang o anghenion mynediad.
• annog busnesau i fynd y tu hwnt i ofynion cyfreithiol. Gwneud newidiadau ymarferol sy'n gwella mynediad, cynhwysiant a phrofiad cyffredinol ymwelwyr.

Pam cymryd rhan?

Gall gwella hygyrchedd helpu'ch busnes i ddenu mwy o ymwelwyr. Gall helpu pobl i ddod o hyd i'r wybodaeth sydd ei hangen arnynt cyn iddynt gyrraedd, leihau rhwystrau a chreu profiad mwy croesawgar.

Defnyddiwch yr adnoddau isod i’ch helpu i:

• ddeall gofynion y grant
• Adolygu eich cynnig hygyrchedd cyfredol
• casglu adborth gan ymwelwyr
• nodi rhwystrau ar draws taith yr ymwelwyr
• blaenoriaethu gwelliannau a fydd yn cael yr effaith fwyaf
• defnyddio tystiolaeth a mewnwelediadau i ddatblygu cais cryfach

Y cyllid sydd ar gael

Mae grantiau o £5,000 i £20,000 ar gael i gefnogi hyd at 75% o'r costau cyfalaf cymwys ar gyfer gwelliannau hygyrchedd.

Pwy all wneud cais?

Busnesau twristiaeth a lletygarwch a mentrau cymdeithasol yng Nghymru sydd:

• Yn cyflogi llai na 250 o bobl
• Wedi bod yn masnachu am o leiaf flwyddyn
• Gyda eu gwefan eu hunain
• Yn ariannol hyfyw
• Wedi gwylio fideo esboniad Croeso i Bawb video

Cam 1: Darllenwch y nodiadau canllaw

Dechreuwch trwy ddarllen y nodiadau canllaw. Maen nhw'n esbonio:

• yr hyn y mae Grant Cyfalaf Croeso i Bawb yn ei gefnogi
• pwy all wneud cais
• pa gostau a allai fod yn gymwys i gael cyllid
• pa dystiolaeth y bydd ei hangen arnoch
• sut y bydd ceisiadau yn cael eu hasesu

Pam mae hyn yn bwysig: Mae'r cam hwn yn eich helpu i ddeall pwrpas a gofynion y cyllid. Mae cais cryf yn dechrau gyda dealltwriaeth glir o'r grant a'r canlyniadau y mae wedi'i gynllunio i'w cefnogi.

Cam 2: Gwyliwch y fideo Cyflwyniad i Hygyrchedd

Os penderfynwch wneud cais, rhaid i chi wylio'r fideo. Bydd yn eich helpu i:

• gydnabod rhwystrau hygyrchedd cyffredin
• deall sut mae hygyrchedd da yn edrych yn ymarferol
• nodi a blaenoriaethu gwelliannau
• nodi gwelliannau a allai gael yr effaith fwyaf

Mae'r fideo wedi'i gynllunio i gefnogi cynllunio prosiect a gwneud penderfyniadau. Mae'r fideo yn darparu canllawiau ymarferol i'ch helpu i ddatblygu cynigion sydd

• yn seiliedig ar dystiolaeth, 
• yn realistig ac yn canolbwyntio ar ymwelwyr, ac 
• yn cyd-fynd â nodau'r grant.

Cam 3: Gofynnwch i ymwelwyr am eu profiad

Defnyddiwch yr Holiadur Hygyrchedd Ymwelwyr i gasglu adborth gan ymwelwyr.

Mae’r holiadur:

• yn ddewisol ac yn ddienw
• wedi'i gynllunio ar gyfer ymwelwyr i ddweud wrthych am eu profiad 
• yn ffordd syml o nodi beth sy'n gweithio'n dda a lle gall rhwystrau fodoli

Argraffwch gopïau a'u gosod yn rhywle gweladwy ac yn hawdd eu cyraedd. Gall ymwelwyr wedyn rannu adborth yn gyflym am eu profiad.

Mae'r holiadur at eich defnydd eich hun. Gall yr adborth eich helpu i:

• ddeall anghenion ymwelwyr
• nodi rhwystrau ar draws taith yr ymwelwyr
• cydnabod yr hyn sydd eisoes yn gweithio'n dda
• blaenoriaethu meysydd i'w gwella

Pam mae hyn yn bwysig: Mae adborth yn dangos bod eich prosiect arfaethedig yn ymateb i anghenion ymwelwyr go iawn, nid rhagdybiaethau.

Cam 4: Adolygu taith yr ymwelydd yn ei chyfanrwydd

Defnyddiwch yr Asesiad Hygyrchedd Busnes i adolygu eich cynnig i ymwelwyr.

Mae'r Asesiad yn cwmpasu taith lawn yr ymwelydd, gan gynnwys:

• gwybodaeth cyn cyrraedd
• cyrraedd a mynediad i'r safle
• symud o gwmpas y busnes
• cyfleusterau a Gweithgareddau
• cyfathrebu a Gwybodaeth
• yr amgylchedd synhwyraidd
• cysur a lles

Defnyddiwch yr asesiad i:

• gofnodi eich darpariaeth hygyrchedd bresennol
• nodi rhwystrau a bylchau
• blaenoriaethu gwelliannau
• nodi prosiectau posibl ar gyfer cyllid

Ystyriwch:

• mynediad corfforol, megis llwybrau, seddi, cownteri, toiledau, arwyddion a gofod cylchrediad
• gwybodaeth a chyfathrebu, megis gwybodaeth ar eich gwefan, dulliau cyswllt ac arwyddion clir
• anghenion synhwyraidd a lles, megis goleuadau, lefelau sŵn, mannau tawelach a chysurdeb ymwelwyr

Pam mae hyn yn bwysig: Bydd yr asesiad yn eich helpu i asesu hygyrchedd ar draws yr holl brofiad ymwelydd. Byddwch hefyd yn gallu nodi gwelliannau a allai gael yr effaith fwyaf.

Cam 5: Trowch eich canfyddiadau yn gais cryf

Dylai eich cais esbonio:

• yr hyn a ddywedodd ymwelwyr wrthych chi
• yr hyn a nododd eich asesiad hygyrchedd
• y gwelliannau rydych chi'n bwriadu eu gwneud
• sut y bydd y gwelliannau hynny yn mynd i'r afael â'r rhwystrau a nodwyd
• y manteision disgwyliedig i ymwelwyr, y busnes a'r ardal leol

Defnyddiwch adborth ymwelwyr a chanfyddiadau archwilio i gefnogi eich achos am gyllid a dangos yr angen am y prosiect. Bydd cais clir, sy'n seiliedig ar dystiolaeth yn eich helpu i symud o syniad cychwynnol i gynnig ymarferol a chyflawn.

Cam 6: Yn barod i ddechrau?

Bydd dilyn y camau hyn yn eich helpu i adeiladu cais cryf a sicrhau bod eich gwelliannau arfaethedig yn seiliedig ar anghenion a nodwyd.

Adnoddau

• Nodiadau canllawiau
• Ffurflen Manylion y Prosiect
• Fideo hygyrchedd PIWS
• Holiadur Hygyrchedd Ymwelwyr 
• Asesiad Hygyrchedd Busnes

Bydd y ffurflen gais ar gael o 31 Gorffennaf 2026

Amserlenni

Y dyddiad cau ar gyfer ceisiadau Croeso i Bawb yw 21 Medi 2026 5pm.

Byddwch yn cael eich hysbysu trwy e-bost am ganlyniad eich cais erbyn dechrau mis Tachwedd  
Rhaid cyflawni prosiectau o fewn blwyddyn ariannol 2026-2027, gyda'r holl wariant yn cael ei wneud a'i hawlio erbyn 12 Mawrth 2027.

Mae rhagor o wybodaeth ar gael ar gais gan Croesoibawb@llyw.cymru

Ym mis Gorffennaf 2027, am y tro cyntaf erioed, bydd Cymru'n cynnal un o gymalau ras fyd-enwog y Tour de France. Bydd cymal olaf y DU (Cam 3) yn rhedeg o'r Trallwng i Gaerdydd.

Mae’r digwyddiad mawreddog hwn yn cynnig cyfle unigryw i:

• godi proffil Cymru ar lwyfan y byd,
• cryfhau ei henw da fel cyrchfan o safon fyd-eang, a
• chefnogi ein huchelgais i sefydlu Cymru fel cenedl flaenllaw ar gyfer beicio.

Bydd Cronfa Croeso i Feicwyr yn buddsoddi mewn seilwaith a chyfleusterau led led Cymru sy’n: 

• gwneud Cymru’n fwy croesawgar i feicwyr,
• helpu i dyfu twristiaeth beicio ar draws yr holl ddisgyblaethau
• cefnogi economïau lleol 
• manteisio i’r eithaf ar fuddion hirdymor cynnal y digwyddiad eiconig hwn.

Pwy all wneud cais?

Mae’r gronfa yn agored i:

• Awdurdodau Lleol
• Awdurdodau Parciau Cenedlaethol

(Anogir y ddau i gynnwys prosiectau a gyflawnir gan y trydydd sector a sefydliadau nid-er-elw eraill yn eu ceisiadau)

Rhaid i bob cais fodloni blaenoriaeth (I) isod ac o leiaf dwy o’r pedair blaenoriaeth allweddol arall:

1. Ysgogi cynhyrchiant busnes a thwf Economaidd
   Cefnogi cynhyrchiant busnesau, cynyddu gwariant ymwelwyr, a chryfhau effaith economaidd twristiaeth beicio.
2. Profiadau o Ansawdd Uchel
   Darparu profiadau beicio unigryw a chynhwysol o ansawdd uchel sy’n arddangos Cymru fel cyrchfan feicio flaenllaw.
3. Profiadau Diwylliannol, Treftadaeth a Thirwedd
   Dangos sut y mae beicio yn cael ei ddefnyddio fel modd i brofi a dathlu diwylliant, treftadaeth, tirweddau a chymunedau unigryw Cymru, gan greu profiadau ymwelwyr nodedig a chofiadwy sy’n ddilys ac yn nodweddiadol Gymreig.
4. Cydweithio a Phartneriaethau
   Cyfrannu at gynnig twristiaeth beicio mwy cydgysylltiedig a chydlynol ledled Cymru drwy gydweithio effeithiol a gweithio mewn partneriaeth.
5. Cefnogi Pobl, Cymunedau, Iechyd a Llesiant
   Sicrhau canlyniadau cadarnhaol i bobl a chymunedau, gan gefnogi iechyd, llesiant a chyfranogiad cynhwysol drwy feicio.

Lefel y Cyllid sydd ar Gael
Cronfa gyfalaf yw hon. Nid yw costau refeniw yn gymwys.

• Cyfanswm y grant sydd ar gael yw £100,000; fodd bynnag, gall Awdurdodau Lleol ac Awdurdodau Parciau Cenedlaethol gyflwyno mwy nag un Datganiad o Ddiddordeb (EOI).
• Y gyfradd ymyrraeth uchaf yw 80%
• Nid oes isafswm grant

Amserlen 

• Y dyddiad cau ar gyfer Datganiadau o Ddiddordeb yw 13:00 ddydd Gwener, 7 Awst 2026.
• Os bydd eich Datganiad o Ddiddordeb (cam 1) yn llwyddiannus, fe'ch gwahoddir i gyflwyno cais llawn (cam 2).
• Anfonir hysbysiad o ganlyniad ceisiadau cam 2 o 26 Hydref 2026 ymlaen.
• Rhaid i brosiectau sy'n cael eu cyflawni o fewn un flwyddyn ariannol (2026–2027) gael eu cwblhau, gyda'r holl wariant wedi'i wneud a'i hawlio erbyn 1 Mawrth 2027.
• Os gall prosiect gyfiawnhau'r angen am amserlen hirach, gellir ariannu'r prosiect dros ddwy flwyddyn ariannol. Ar gyfer prosiectau sy'n ymestyn dros ddwy flwyddyn ariannol, rhaid i'r holl wariant gael ei wneud a'i hawlio erbyn 31 Ionawr 2028.

Mae rhagor o wybodaeth ar gael ar gais drwy anfon e-bost at CronfaCroesoiFeicwyr@llyw.cymru

Rydym bellach yn gwahodd Datganiadau o Ddiddordeb, ac mae Canllawiau hefyd ar gael.

Dyddiad cau ar gyfer Datganiadau o Ddiddordeb: 13:00 ddydd Gwener, 7 Awst 2026.

Dylid anfon ffurflenni wedi’u cwblhau at CronfaCroesoiFeicwyr@llyw.cymru

Mae Y Pethau Pwysig yn gronfa gyfalaf i gyflawni gwelliannau i seilwaith twristiaeth ar raddfa fach ledled Cymru. 

Pwy oedd yn medru gwneud cais?
Roedd y gronfa eleni yn agored i: 

• Awdurdodau Lleol 
• Awdurdodau Parciau Cenedlaethol 

Diben y gronfa oedd sicrhau gwelliannau mewn seilwaith sylfaenol ond hanfodol i ymwelwyr mewn cyrchfannau twristiaeth strategol ledled Cymru i sicrhau bod pob ymwelydd yn cael profiad cadarnhaol a chofiadwy ymhob agwedd ar eu harhosiad.

Ar gyfer y cylch ariannu hwn, rhaid i bob cais ganolbwyntio ar flaenoriaeth (1) isod ynghyd ag o leiaf un o’r 3 flaenoriaeth arall

1. Cyrchfannau amgylcheddol gynaliadwy. Datblygu seilwaith newydd neu drawsnewid seilwaith sy'n bodoli eisoes i wneud y gyrchfan yn fwy cynaliadwy, gan helpu i leihau'r ôl troed carbon.
2. Lleddfu mannau prysur mewn lleoliadau poblogaidd a chefnogi cyrchfannau ymwelwyr o safon uchel  
3. Twristiaeth Hygyrch a Chynhwysol. Cefnogi prosiectau sy'n dileu rhwystrau ac yn gwella mynediad at gyfleusterau i bawb.
4. Gwella y cynnig i ymwelwyr drwy gynnig profiadau sy’n rhoi ymdeimlad o le, er enghraifft trwy ddarparu seilwaith ar gyfer digwyddiadau, cynlluniau dehongli, llwybrau cerdded a phrosiectau sy’n rhoi llwyfan i fwyd, treftadaeth, diwylliant a’r Gymraeg. 

Cronfa gyfalaf oedd hon. Nid oedd costau refeniw yn cael eu hystyried. Cyfanswm y grant ar gael oedd £300,000 gydag uchafswm cyfradd ymyrraeth o 80%. Nid oedd isafswm grant

Ar gyfer y rownd hon, cafodd ymgeiswyr amser ychwanegol i gyflawni prosiectau (os oedd angen). Os oedd eich Datganiad o Ddiddordeb yn llwydiannus, (cam 1) fe'ch gwahoddwyd i gyflwyno cais (cam 2). Bydd ymgeiswyr yn cael gwybod os yw eu cais cam 2 yn llwyddiannus o’r 1af o Ebrill 2025. 

Ar gyfer prosiectau 1 blwyddyn, bydd yn rhaid gwario a hawlio’r arian erbyn 01 Mawrth 2026. 

Os oes cyfiawnhad am brosject 2 flynedd, gellir ariannu’r prosiect ar draws 2 flwyddyn ariannol ac felly roedd angen iddo ddangos proffil cost clir ar gyfer 2025-26 a 2026-27. Rhaid cwblhau’r prosiect erbyn 31 Ionawr 2027.

Gallwch anfon unrhyw gwestiynau am y gronfa i TwristiaethRhanbarthol@llyw.cymru.

Cynigion a wnaethbwyd Ebrill 2025 i Ionawr 2027

Mae Llywodraeth Cymru, mewn partneriaeth â Banc Datblygu Cymru, wedi lansio cronfa newydd gwerth £50mn, Cronfa Buddsoddi mewn Twristiaeth, Cymru, sy’n dod ag arian masnachol ac arian grant ynghyd mewn un pecyn cyfun o gymorth ariannol er mwyn darparu buddsoddiad cyfalaf i’r sector.

Amcanion y gronfa 
Er mwyn cynnal a datblygu safle Cymru mewn marchnad dwristiaeth fyd-eang eithriadol o gystadleuol, mae angen inni barhau i fuddsoddi yn ein cynnyrch twristiaeth. Amcan allweddol y Gronfa fydd helpu i ariannu buddsoddiad cyfalaf mewn prosiectau twristiaeth sydd â chyfle i greu argraff gadarnhaol ar y sector a datblygu economi Cymru.

Diben y gronfa

• Sicrhau bod prosiectau twristiaeth yng Nghymru yn dal i allu manteisio ar gyllid
• Helpu’r sector twristiaeth drwy’r cyfnod pontio o’r ddibyniaeth ar arian grant i gyfnod lle mae’n gweithredu ar sail benthyciadau masnachol.
• Caniatáu defnyddio arian cyhoeddus mewn maes a allai gael effaith sylweddol ar yr economi.
• Gallu cefnogi buddsoddiadau strategol, a allai fod yn rhai sylweddol, yn ôl yr angen. 

Beth fydd y gronfa'n ei ariannu?

• Bydd y gronfa newydd yn darparu cyfalaf i fusnesau twristiaeth, rhwng £100,000 a £5,000,000 i brosiectau cymwys.
• Mae’r cyfnod ad-dalu rhwng 10 a 15 mlynedd, a gall gynnwys ysbeidiau talu tymhorol.
• Bydd yn golygu mwy o hyblygrwydd o ran ariannu.
• Bydd yr arian ar gael o'r adeg y bydd prosiect yn dechrau ac fe’i telir fesul cyfran drwy’r cyfnod datblygu.
• Bydd taliadau benthyciad masnachol a grant cymwys yn cael eu cyfuno er mwyn lleihau cost y cyllid drwyddi draw.

Pwy sy'n gymwys?

Mae Cronfa Buddsoddi mewn Twristiaeth, Cymru yn gronfa fuddsoddi sy’n cynnwys cymysgedd o arian ad-daladwy ac arian nad yw’n ad-daladwy, fydd yn targedu prosiectau buddsoddi cyfalaf cymwys yn y sector twristiaeth yng Nghymru. Gellid ei defnyddio un ai i uwchraddio asedau presennol, neu i greu asedau newydd, o safon uchel, yn y sector twristiaeth.

I gael ei ystyried am gymorth drwy Gronfa Buddsoddi mewn Twristiaeth, Cymru, bydd angen i ymgeisydd:

• Ymrwymo i gefnogi strategaeth Ffyniant i Bawb Llywodraeth Cymru a dangos ymrwymiad i bedwar gofyniad y Contract Economaidd
• Bod wedi’i leoli yng Nghymru a dangos sut bydd y prosiect yn ysgogi twf mewn marchnadoedd newydd a marchnadoedd presennol, ac yn creu a/neu ddiogelu swyddi
• Dangos hyfywedd ariannol a’r gallu i ad-dalu dros gyfnod y pecyn ariannu.

Y Camau Nesaf 

Mae’r gronfa yn cynnwys proses ymgeisio ddau gam. Mae’r cam cyntaf yn cynnwys ffurflen Mynegi Diddordeb ac, os bydd y busnes yn llwyddiannus ar y cam hwn, caiff ei wahodd wedyn i wneud cais llawn. Mae cwestiynau cyffredin ar gael hefyd.  

Os oes gennych ddiddordeb mewn cael rhagor o wybodaeth am y gronfa, anfonwch ebost at CBTC@llyw.cymru neu alw 03000 622418.

Cynigion a wnaethbwyd 01 Ebrill 2020 i 31 Mawrth 2024