Er bod y cynllun hwn yn amlinellu ein gweledigaeth ar gyfer y dyfodol, ac yn egluro'r blaenoriaethau ar gyfer Croeso Cymru, dim ond un o nifer o bartneriaid ydym ni sydd â rhan i'w chwarae er mwyn cyflawni'r nodau hyn. O ganlyniad, nid ydym wedi datblygu'r cynllun hwn ar ein pennau ein hunain. Mae wedi'i lunio drwy sgwrs eang â'r diwydiant a rhan-ddeiliaid.
Mae'r cynllun wedi'i lywio gan dueddiadau hirdymor sy'n dylanwadu ar dwristiaeth yn fyd-eang, o'r modd y mae disgwyliadau ymwelwyr yn newid, i'r ffactorau mawr sy'n llywio'r ffordd y mae pobl yn teithio. Yn ei hanfod, mae hefyd yn seiliedig ar ddadansoddiad manwl o berfformiad presennol yr economi ymwelwyr yng Nghymru, ei ragolygon a'i botensial ar gyfer twf yn y dyfodol.
Uchelgais a nodau.
- Ein huchelgais yw tyfu twristiaeth er budd Cymru. Mae hyn yn golygu cyflawni twf economaidd sy'n sicrhau budd i bobl a lleoedd gan gynnwys cynaliadwyedd amgylcheddol, cyfoethogi cymdeithasol a diwylliannol a buddiannau iechyd.
- Prif nod ein cynllun fydd defnyddio'r potensial ar gyfer twristiaeth i wella llesiant economaidd ehangach Cymru.
Ein partneriaid pwysicaf yn hyn oll yw busnesau twristiaeth yng Nghymru. Mae twristiaeth yn sector byd-eang hynod gystadleuol ac mae ein llwyddiant yn y dyfodol yn dibynnu'n llwyr ar fuddsoddiad, arloesedd a chydweithrediad parhaus gan y sector preifat. Mae'r cynllun hwn yn amlinellu'r ffordd y byddwn yn eich helpu chi i wneud i hynny ddigwydd, ac rydym yn gofyn i'r diwydiant gefnogi ein blaenoriaethau ar gyfer y dyfodol.
Gallwch weld y cynllun gweithredu twristiaeth diweddaraf a gwybodaeth berthnasol arall yma.
