Diweddarwyd ddiwethaf: Tachwedd 2026

Cefndir

Mae Baromedr Busnes Twristiaeth Cymru wedi'i gynllunio i roi adborth cyflym ar sut mae'r diwydiant twristiaeth yng Nghymru yn perfformio ar adegau allweddol yn ystod y flwyddyn. Mae’r don hon yn edrych ar berfformiad dros haf 2026 ac yn cynnwys cwestiynau am dwristiaeth beicio a hygyrchedd.

Mae'r canfyddiadau'n seiliedig ar arolwg ffôn gyda 900 o gyfweliadau â busnesau Twristiaeth ledled Cymru.

Canfyddiadau

Denwyd ymwelwyr gan dywydd heulog cynnes

  • Cafodd oddeutu traean (34%) o fusnesau fwy o ymwelwyr yr haf hwn o gymharu â’r haf diwethaf, a chafodd 45% yr un lefel o ymwelwyr. 
  • Dim ond lleiafrif o fusnesau (21%) a ddywedodd fod nifer eu hymwelwyr wedi gostwng. 
  • Mae’r cynnydd hwn i’w weld yn gyson ar draws pob sector a rhanbarth. 

Yn dilyn camau cynharach y baromedr eleni, mae perfformiad y diwydiant yn parhau i fod yn gymysg yn y rhan fwyaf o sectorau.

  • Y rheswm mwyaf cyffredin a nodwyd am fod yn brysurach nag arfer oedd y tywydd (dywedwyd hyn yn ddigymell gan 54% o’r gweithredwyr a fu’n brysurach). 
  • Yn ôl y Swyddfa Dywydd, credir mai haf 2026 (Mehefin – Awst) fu’r haf cynhesaf i’w gofnodi yn y DU, gyda sawl diwrnod dros 30 gradd ac ychydig iawn o law tua diwedd mis Awst.

 

Mae ansicrwydd ynghylch incwm gwario yn parhau i lesteirio’r galw

  • Ni chafodd pob busnes haf prysur. Y rheswm mwyaf cyffredin a nodwyd yn ddigymell gan weithredwyr oedd bod ‘pobl yn brin o incwm gwario’ (34%).
  • Hefyd, dywedodd rhai busnesau na fu’r tywydd cynnes o help iddynt, yn enwedig atyniadau dan do yn ystod cyfnodau o dywydd dymunol yn yr awyr agored, neu atyniadau awyr agored nad oedd ganddynt lawer o gysgod i’w gynnig yn ystod tywydd poeth iawn.

 

Cynnydd yn niferoedd ymwelwyr tramor

  • Dywedodd traean (32%) o fusnesau eu bod wedi cael mwy o ymwelwyr tramor o gymharu â’r llynedd, a dywedodd eu hanner (50%) eu bod wedi cael yr un lefel o ymwelwyr tramor. 
  • Perfformiodd marchnadoedd tir mawr Ewrop yn dda, yn enwedig yr Almaen a’r Iseldiroedd.

 

Cyfleoedd beicio’r Tour de France

  • Dywedodd rhai busnesau (13%) fod twristiaeth feicio’n ‘bwysig iawn’ i ddyfodol eu busnes, a dywedodd 22% yn ychwaneg fod yr elfen honno’n ‘weddol bwysig’. 
  • Ymhlith y rhai a oedd o’r farn bod twristiaeth feicio’n bwysig, roedd 42% yn bwriadu manteisio ar y cyfle hirdymor a ddaw yn sgil hybu beicio yng Nghymru trwy gyfrwng y Tour de France.

 

Diwallu anghenion hygyrchedd

  • Roedd un o bob pump (20%) o weithredwyr o’r farn bod eu busnes wedi’i gynllunio’n ‘dda iawn’ ar gyfer cwsmeriaid ag anghenion hygyrchedd, ac roedd 40% yn ychwaneg o’r farn bod eu busnes wedi’i gynllunio’n ‘weddol dda’. 
  • Yn achos y rhai a oedd o’r farn bod eu busnes wedi’i gynllunio’n dda ar gyfer cwsmeriaid ag anghenion hygyrchedd, roedd eu hanner (50%) yn hyrwyddo’r agwedd honno ar eu busnes.
  • Roedd gan oddeutu chwarter (23%) o weithredwyr ddiddordeb mewn cael cyngor gan Croeso Cymru ynglŷn â sut y gallai eu busnes fod yn fwy hygyrch. 

Dyma’r math o gyngor y byddent yn dymuno’i gael:

  • sut i ymgeisio am grantiau (69%)
  • sut i ddiwallu anghenion mewn modd cost-effeithiol (52%)
  • esboniad o’r gwahanol anghenion a’r modd y gellir eu diwallu (52%)
  • sut i gydymffurfio â’r gyfraith (45%)

 

Hyder

  • Roedd oddeutu un o bob pump (18%) o weithredwyr yn teimlo’n ‘hyderus iawn’ ynglŷn â rhedeg busnes proffidiol eleni, a dywedodd 44% yn ychwaneg eu bod yn ‘weddol hyderus’. 
  • Llwyddodd y tywydd braf dros yr haf i roi hwb i nifer yr ymwelwyr, ond dywedodd rhai gweithredwyr fod costau cynyddol yn ei gwneud hi’n anodd iddynt barhau i fod yn broffidiol.
  • Llwyddodd perfformiad da dros yr haf i roi hwb i hyder gweithredwyr eleni. Cafodd y lefelau hyder a fesurwyd ar yr un adeg y llynedd eu llesteirio’n fawr gan y cynnydd mewn costau byw. 
  • Ym mis Medi 2025, roedd 21% o weithredwyr yn teimlo’n ‘hyderus iawn’ ac roedd 31% yn teimlo’n ‘weddol hyderus’.

Darllenwch yr adroddiad llawn ar y Baromedr Twristiaeth: cam yr haf 2026

Straeon Perthnasol

Dau feiciwr yn mynd tuag at bont droed yn croesi llyn enfawr.

Galw'r farchnad

Bob blwyddyn mae Croeso Cymru yn cynnal ymchwil ymhlith ei marchnadoedd blaenoriaeth