Mae Le Tour de France yn dod i Gymru! Yn 2027, bydd y Tour de France a’r Tour de France Femmes avec Zwift yn cynnal eu tri chymal cyntaf ym Mhrydain Fawr – digwyddiad a elwir yn y Grand Départs.

Bydd y ras i ddynion yn dechrau yng Nghaeredin ar 2 Gorffennaf ac yn teithio i Gaerdydd, tra bydd y ras i ferched yn dechrau yn Leeds ar 30 Gorffennaf ac yn teithio i Lundain.

Bydd Le Tour de France yn cyrraedd Cymru ar 4 Gorffennaf, sef trydydd cymal y ras. Bydd y llwybr yn arwain y beicwyr o’r Trallwng, drwy bum sir, i Gaerdydd.

Eisiau gwybod mwy? Dyma rai ffeithiau a ffigurau.

  • Le Tour de France

    • Y Tour de France yw’r digwyddiad chwaraeon blynyddol mwyaf yn y byd, ac mae wedi cael ei gynnal bob blwyddyn ers 1903 (ac eithrio’r cyfnodau 1915–18 a 1940–46)
    • Mae’r ras tua 3,500km o hyd ac yn cael ei chynnal dros 21 cymal. Hon yw’r ras hyna’ a’r fwyaf mawreddog o’r tair Grand Tour, sy’n cynnwys y Giro d’Italia a’r Vuelta a España
    • Geraint Thomas yw’r unig Gymro – a dim ond y trydydd Prydeiniwr i ennill y Tour de France (yn 2018)
    • Cynhaliwyd y Tour de France Femmes avec Zwift am y tro cyntaf yn 2022
    • Mae’n digwydd ar ôl ras y dynion ym mis Gorffennaf/Awst bob blwyddyn, ac yn cynnwys wyth cymal

  • The Grand Départ

    • Y Grand Départ yw’r enw a roddir i ddechrau’r ras, yn enwedig pan gaiff ei chynnal y tu allan i Ffrainc
    • Mae’r tri chymal o’r ddwy Grand Départ yn rhan lawn o’r ras, ac yn cyfrif tuag at y canlyniad terfynol
    • Dyma’r trydydd tro i Grand Départ y Tour de France gael ei chynnal yn y DU, ar ôl Llundain a Chernyw yn 2007, a Swydd Efrog yn 2014
    • Dyma’r tro cyntaf i’r ddwy ras ddechrau yn yr un wlad y tu allan i Ffrainc

  • Le Tour de France - Ffeithiau a Ffigurau

    (yn seiliedig ar ras 2025)

    • 184 o feicwyr mewn 23 o dimau
    • 12 miliwn o wylwyr ar hyd y llwybr
    • Darlledu i 190 o wledydd ledled y byd
    • Bron i 110 awr o ddarllediadau byw
    • Dros 1 biliwn o oriau wedi’u gwylio
    • 86 miliwn o ymweliadau â gwefan y Tour de France
    • 740 miliwn o fideos wedi’u gwylio ar sianeli swyddogol
    • 150 o gerbydau’r carafan, yn ffurfio convoy o 10km o hyd

Cymal 3 Llwybr Cymru

Bydd trydydd diwrnod a diwrnod olaf Grand Départ y Tour de France 2027 yn gweld Le Tour de France yn dod i Gymru am y tro cyntaf erioed.

Bydd y llwybr yn cychwyn yng nghanol tref y Trallwng ac yn teithio drwy galon werdd Cymru. Bydd yn pasio drwy drefi marchnad gwledig Canolbarth Cymru, gan gynnwys Y Drenewydd, Llandrindod, Llanfair-ym-Muallt ac Aberhonddu.

Ar ôl Aberhonddu, daw’r dringfeydd anodd ac cyflym! Mae wyth dringfa wedi’u categoreiddio ar hyd y llwybr, gyda chwech o fewn yr 80 cilomedr olaf wrth i’r peloton deithio drwy a thros gymoedd de Cymru.

Bydd hyn yn arwain at orffeniad cyflym ar y disgyniad o gopa’r Côte de Caerffili i Gaerdydd, gan basio Castell Caerdydd cyn gorffen y tu allan i Goleg Brenhinol Cerdd a Drama Cymru.

Safleoedd nodedig ar hyd y llwybr:

  • Castell Powis
  • Yr Amgueddfa Feicio Genedlaethol, Llandrindod
  • Maes Sioe Frenhinol Cymru, Llanfair-ym-Muallt
  • Mynydd Epynt
  • Pen-y-Fan
  • Zip World
  • Castell Caerffili
  • Castell Caerdydd

Map o lwybr Cymal 3 Le Tour de France (Saesneg yn unig)

Gwyliwch yn fyw. Dilynwch bob eiliad.

  

Gallwch wylio Le Tour de France Grand Départ 2027 ar Channel 5, a bydd yr uchafbwyntiau’n cael eu dangos ar S4C. Dilynwch y sianeli cyfryngau cymdeithasol isod i gael y newyddion a’r wybodaeth ddiweddaraf am Le Tour de France:

Straeon Perthnasol

Beddgelert ar y Brailsford Way, Gogledd Cymru

Le Tour de France yn dod i Gymru

Sut y gall busnesau twristiaeth fanteisio i’r eithaf ar Le Tour de France 2027 a helpu i adeiladu etifeddiaeth barhaol ar gyfer beicio yng Nghymru.