Mae Y Porthdy, Penffordd-las yng nghanolbarth Cymru yn dangos sut y gall busnesau twristiaeth yng Nghymru greu profiad sy’n croesawu beicwyr, drwy ddyluniad meddylgar, cyfleusterau ymarferol a dealltwriaeth glir o anghenion ymwelwyr.
Gan ddarparu ar gyfer beicwyr ffordd, graean a mynydd, mae Y Porthdy wedi’i leoli ei hun fel canolfan groesawgar ar gyfer grwpiau beicio o bob math. Gall gwesteion gychwyn yn syth o’r drws, gyda mynediad at amrywiaeth o lwybrau lleol yng Nghoedwig Hafren a Mynyddoedd Cambria ac o’u hamgylch, yn ogystal â beicwyr sy’n teithio ar hyd Lôn Las Cymru neu Lwybr Cenedlaethol 8 o Gaergybi i Gaerdydd. Mae’r tîm yn sicrhau bod ganddynt bopeth sydd ei angen arnynt ar gyfer arhosiad cyfforddus a di-drafferth.
Cyfleusterau
Mae’r cyfleusterau o safon uchel wedi’u cynllunio’n benodol ac yn rhan allweddol o’u cynnig. Mae Y Porthdy yn darparu raciau beiciau diogel, wedi’u dylunio a’u cynhyrchu yng Nghymru. Mae gweithdy llawn offer ar gael hefyd, gyda chywasgydd, stondinau gwaith dan do ac yn yr awyr agored, yn ogystal â chyfleusterau golchi beiciau. Ar ddiwrnodau gwlyb, ar ôl taith hir, neu hyd yn oed ar ddiwrnod braf, gall beicwyr fanteisio ar ystafell sychu eang, sy’n gallu delio ag offer ar gyfer hyd at 40 o bobl.
Mae’r busnes hefyd wedi rhoi sylw gofalus i hyblygrwydd a hwylustod. Mae beiciau mynydd trydan ar gael i’w llogi oddi ar y safle. I’r rheini sy’n cynllunio teithiau o bwynt i bwynt, mae Y Porthdy yn cynnig gwasanaeth trosglwyddo beiciau gan ddefnyddio trelars beiciau pwrpasol ar gyfer 8 ac 16 o feiciau, ynghyd â bws gwennol. Mae'r gwasanaethau ychwanegol hyn yn helpu i wneud teithiau beicio hirach neu fwy uchelgeisiol yn hawdd i'w trefnu.
Mae Y Porthdy yn cynnig llawer mwy na chyfleusterau o safon. Mae’n creu gofod cynnes a chroesawgar lle gall grwpiau ymlacio. Ar ôl diwrnod ar y beic, mae gwesteion yn ymgynnull yn y lolfa fawr, gan fwynhau’r golygfeydd panoramig dros Fynyddoedd Cambria a rhannu straeon am eu teithiau. Mae’r gofod hefyd wedi cael ei ddefnyddio ar gyfer lansiadau beiciau, gan gynnwys digwyddiadau gyda Genesis Bikes, gan ddangos yr enw da sydd gan Y Porthdy yn y gymuned feicio.
Cynaliadwyedd yn ganolog i bopeth
Mae Y Porthdy wedi buddsoddi mewn 46 o baneli solar, storfa batri 20kW a phympiau gwres o'r aer. O ganlyniad, mae’n gweithredu heb ddefnyddio olew ac yn lleihau ei ôl troed carbon, gan gefnogi cynnig twristiaeth mwy gwyrdd a chynaliadwy.
Mae Y Porthdy, Penffordd-las yn dangos sut y gall cyfuniad o fanylion bach ac ymrwymiadau mwy greu cyrchfan sy’n wirioneddol groesawgar i feicwyr. Drwy ddeall anghenion beicwyr, mae’n cynnig profiad sy’n annog gwesteion i aros yn hirach, dychwelyd dro ar ôl tro ac argymell Cymru i eraill.
Dysgwch fwy am sut mae Y Porthdy, Penffordd-las yn cefnogi beicwyr (Saesneg yn unig)
Phillip Stasiw, Cydberchennog a Chyfarwyddwr Y Porthdy, Penffordd-las.Gyda’r Tour de France ar fin dod i Gymru, mae hwn yn gyfle gwych i arddangos popeth sydd gan Gymru i’w gynnig i’r gymuned feicio. Mae hefyd yn tynnu sylw at bwysigrwydd paratoi’n gynnar a manteisio’n llawn ar y cyfle i gymryd rhan.
