Cynllun Hygyrchedd Newydd ar gyfer Busnesau Twristiaeth a Lletygarwch yng Nghymru
Mae Croeso i Bawb yn gynllun newydd gan Croeso Cymru. Bydd yn cefnogi busnesau twristiaeth a lletygarwch i greu amgylchedd ymwelwyr mwy hygyrch a chynhwysol.
Bydd y cynllun yn ariannu gwelliannau ffisegol sy'n dileu rhwystrau i ymwelwyr. Gall y newidiadau hyn wneud ymweliadau yn haws i bobl sydd ag ystod eang o anghenion.
Mae'r cynllun yn annog busnesau i fynd y tu hwnt i ofynion cyfreithiol. Mae'n cefnogi newidiadau ymarferol sy'n gwella mynediad a chynhwysiant.
Bydd cyllid ar gael ar gyfer prosiectau cyfalaf. Rhaid i'r prosiectau hyn wella mynediad at gyfleusterau twristiaeth a lletygarwch. Y nod yw sicrhau bod pawb yn teimlo bod Cymru yn lle croesawgar.
Pam mae Hygyrchedd yn Bwysig
Mae tua 25% o deithiau gwyliau dros nos i Gymru yn cynnwys rhywun sydd ag amhariad neu ofyniad mynediad.
Mae gwella hygyrchedd yn helpu mwy o bobl i fwynhau Cymru yn hyderus, gan gynnwys:
- ymwelwyr anabl,
- pobl hŷn,
- teuluoedd â phlant ifanc,
- a pobl sy'n gwella o salwch neu anaf.
Trwy wella hygyrchedd, gall busnesau:
- Gyrraedd marchnadoedd ymwelwyr newydd a rhai sy’n tyfu
- Wella boddhad a ffyddlondeb cwsmeriaid
- Wella eu henw da fel cyrchfannau croesawgar a chynhwysol
- Ddarparu manteision i ymwelwyr ac i gymunedau lleol
Beth allai'r cynllun ei gefnogi?
Er bod y manylion llawn yn dal i'w cwblhau, gall enghreifftiau o welliannau posibl gynnwys:
- Ystafelloedd gwely ac ystafelloedd ymolchi hygyrch
- Lifftiau platfform neu risiau / Gwell mynediad di-risiau
- Drysau awtomatig neu ddrysau mwy llydan
- Mannau croesawu sy’n fwy hygyrch
- Cyfleusterau cymorth clyw gwell
- Toiledau Changing Places a chyfleusterau cysylltiedig
- Seddi awyr agored hygyrch, mannau gwylio a llwybrau ymwelwyr
- Gwell cyfeirnodi drwy arwyddion clir a hygyrch, gan gynnwys nodweddion cyffyrddadwy ac amryliw
- Mannau tawel neu gyfeillgar i’r synhwyrau i gefnogi ymwelwyr sy’n elwa o amgylchedd mwy tawel
- Mannau picnic hygyrch, pwyntiau gwybodaeth i ymwelwyr a nodweddion dehongli
- Addasiadau i fannau hamdden, gweithgareddau neu brofiad ymwelwyr i alluogi mwy o bobl i gymryd rhan a mwynhau’r profiad
- Parcio hygyrch a llwybrau gwell rhwng meysydd parcio a chyfleusterau ymwelwyr
- Gwelliannau ffisegol sy'n cefnogi ymwelwyr sydd â gofynion mynediad gweledol, clyw, symudedd neu niwroamrywiol
- Gwelliannau cyfalaf eraill sy'n dileu rhwystrau ac yn creu profiad ymwelwyr mwy cynhwysol
Bydd y cynllun yn helpu busnesau i wneud gwelliannau ymarferol, o ansawdd uchel. Bydd y gwelliannau hyn yn helpu mwy o bobl i gael mynediad at brofiadau twristiaeth a lletygarwch ledled Cymru a chymryd rhan ynddynt yn llawn.
Rhagor o wybodaeth ar gael yn fuan
Bydd rhagor o wybodaeth yn cael ei rhannu drwy e-gylchlythyr penodol Croeso i Bawb ar:
- Meini prawf cymhwysedd
- Proses ymgeisio
- Amserlenni
- Lefelau cyllido
- Enghreifftiau o brosiectau cymwys
Derbyniwch y diweddariadau diweddaraf
Mae cynllun Croeso i Bawb yn gyfle cyffrous i helpu i wneud Cymru yn gyrchfan hyd yn oed yn fwy croesawgar i bawb sy'n ymweld.
Os oes diddordeb gennych chi mewn derbyn rhagor o wybodaeth am y cynllun a sut y gall eich busnes elwa cofrestrwch i dderbyn cylchlythyr y Diwydiant
