Cyrraedd rhagor o gwsmeriaid a chynyddu archebion

Cynhaliodd Croeso Cymru raglen hyfforddi Masnach Deithio a dosbarthu digidol bwrpasol rhwng Tachwedd 2025 a Ionawr 2026, wedi'i chynllunio i helpu busnesau twristiaeth Cymru i gyrraedd cwsmeriaid newydd, gwella gwelededd a chynyddu archebion drwy sianeli trydydd parti. 

Roedd y rhaglen yn cynnwys tair sesiwn hyfforddi ymarferol ar-lein a oedd yn cynnwys:

• Deall y diwydiant teithio
• Dosbarthu traddodiadol yn y diwydiant teithio
• Dosbarthu digidol a gwelededd ar-lein

Mae'r holl sesiynau wedi cael eu recordio ac ar gael i'w gwylio ar-lein. 

Nawr, mae Croeso Cymru yn eich gwahodd i ymuno â'r weminar olaf yn y gyfres – sesiwn ymarferol â ffocws sy'n dod â'r dysgu allweddol o'r tair sesiwn ynghyd ac yn eich helpu i symud yn hyderus o theori i weithredu.

Mae'r sesiwn olaf hon wedi'i chynllunio i gefnogi busnesau yn ystod pob cam o'u taith. Os ydych yn newydd i Fasnach Deithio a dosbarthu ar-lein, bydd yn eich helpu i ddeall sut mae'r sianeli hyn yn gweithio a sut i ddechrau. Os ydych eisoes yn weithgar yn y marchnadoedd hyn, bydd yn sesiwn loywi werthfawr ac yn gyfle i fireinio eich ffordd o weithredu a dysgu am dueddiadau sy'n dod i'r amlwg.

Yn ystod y weminar, byddwch chi:

• Yn derbyn crynodeb clir o ddysgu allweddol y tair sesiwn, gan gynnwys sut mae'r diwydiant teithio yn gweithio, pam mae'n bwysig, beth mae prynwyr yn ei ddisgwyl, sut i brisio eich cynhyrchion a'r hyn sydd ei angen arnoch i werthu ar-lein yn effeithiol
• Yn cael atebion i gwestiynau cyffredin a godwyd yn ystod y sesiynau blaenorol, yn ogystal â chwestiynau a gyflwynwyd gan fusnesau ers i'r rhaglen ddechrau
• Yn dysgu camau ymarferol, realistig y gallwch eu cymryd ar unwaith i wella eich gwelededd, gwneud archebu gyda chi yn fwy deniadol a gwella eich llwyddiant masnachol
• Yn clywed yn uniongyrchol gan weithredwyr teithiau a chwmnïau rheoli cyrchfannau, a fydd yn rhannu eu profiadau o'r hyn sy'n gweithio yn y byd go iawn a'r hyn sydd eu heisiau arnyn nhw pan fyddan nhw'n gweithio gyda busnesau yng Nghymru.
• Yn cwrdd â thîm Masnach Deithio Croeso Cymru, deall yr hyn maen nhw'n ei wneud a dysgu sut y gallan nhw gefnogi eich busnes yn y dyfodol
• Yn cymryd rhan mewn sesiwn holi ac ateb fyw i ofyn unrhyw gwestiynau sydd heb eu hateb

Mae'r weminar hon ar agor i holl fusnesau twristiaeth Cymru, gan gynnwys:

• Darparwyr llety, o Gwely a Brecwast sy'n cynnig prisiau i unigolion i westai mwy sy'n darparu ar gyfer unigolion a grwpiau
• Atyniadau –  am ddim a'r rhai sy'n codi tâl
• Cwmnïau gweithgareddau / gweld atyniadau
• Awdurdodau lleol 
• Sefydliadau Marchnata Rhanbarthol, Sefydliadau Marchnata Cyrchfannau a Chymdeithasau Masnach
• Clybiau golff

Er mwyn cael y budd gorau posibl o'r sesiynau, anogir busnesau i wylio'r tair sesiwn hyfforddi – sydd wedi cael eu recordio ymlaen llaw.

Cofrestrwch heddiw a chymerwch y cam olaf tuag at ryddhau cyfleoedd i'ch busnes ennill archebion newydd.

Ymwadiad:  Ar gyfer cyfranogwyr unigol yn unig mae'r weminar hon.  Peidiwch â defnyddio bots AI neu systemau awtomataidd i ymuno â'n cyfarfodydd rhithwir.  Os canfyddir bod bot AI yn cael ei ddefnyddio, bydd y cyfranogwr yn cael ei dynnu a'i wahodd i ailymuno pan fydd y swyddogaeth AI wedi cael ei diffodd. Bydd recordiad o'r weminar gyfan ar gael ar ein gwefan diwydiant yn dilyn y digwyddiad.  Mae cymryd rhan yn ddarostyngedig i Hysbysiadau Preifatrwydd y Diwydiant Twristiaeth | Diwydiant Croeso Cymru, sy'n egluro sut yr ymdrinnir â recordiadau o weminarau a data mynychwyr yn unol â'r GDPR.

Ydych chi'n fusnes twristiaeth o Gymru sydd am gyrraedd cwsmeriaid newydd a rhoi hwb i'ch archebion?

Sesiynau hyfforddi ar-lein ymarferol, hawdd eu dilyn sydd wedi'u cynllunio i'ch helpu i ddysgu am ffyrdd newydd o gyrraedd cwsmeriaid newydd.  Mae hyn yn cynnwys eich helpu i wneud y gorau o sianeli dosbarthu teithio gan gynnwys y diwydiant teithio (cwmniau teithiau ac asiantau) ac ar-lein i gynyddu gwelededd ac archebion.

Mae'r sesiynau hyn yn addas i bawb – p'un a ydych yn fusnes bach neu fawr, yn newydd i'r diwydiant teithio, ac yn defnyddio sianeli ar-lein ai peidio. Ar gyfer busnesau sydd eisoes yn brofiadol, yn gweithio gyda'r diwydiant teithio neu sianeli archebu ar-lein, mae hwn yn gyfle gwych i loywi ac yn gyfle i ddarganfod y tueddiadau diweddaraf i fynd â'ch busnes ymhellach.  Croeso i fusnesau o bob maint a phrofiad.

• Dysgwch sut i gynyddu archebion trwy weithio gyda thrydydd parti, tra'n lleihau risgiau a lleihau gwariant marchnata.
• Clywed am ffyrdd effeithlon o reoli'ch busnes, gan gynnwys sut y gall AI eich helpu i arbed amser a gwaith.
• Cael atebion clir i bryderon cyffredin am ddosbarthu eich cynnyrch trwy'r diwydiant teithio a sianeli ar-lein.
• Manteisiwch ar adnoddau defnyddiol, templedi, a chefnogaeth barhaus i'ch helpu i lwyddo.

I gael y manteision llawn, gwyliwch bob un o'r tair sesiwn hyfforddi ar-lein. 

Sesiwn 1: Deall y Diwydiant Teithio 

• Beth yw'r "diwydiant teithio" (traddodiadol a digidol)?
• Sut mae'r diwydiant teithio yn gweithio?
• Pam gweithio gyda'r diwydiant teithio?
• Beth mae gwahanol farchnadoedd yn chwilio amdano?

Sesiwn 2: Dosbarthu yn y Diwydiant Teithio 

• Beth yw'r diwydiant teithio traddodiadol?
• Beth mae'r diwydiant teithio yn ei ddisgwyl gennych chi?
• Sut ydych chi'n prisio'ch cynnyrch ar gyfer y diwydiant teithio?
• Sut ydych chi'n cysylltu â'r diwydiant teithio?

Sesiwn 3: Dosbarthu digidol a gwelededd 

• Beth yw'r diwydiant teithio digidol?
• Pam dosbarthu digidol?
• Beth sydd ei angen arnoch i werthu ar-lein?
• Sut gall AI helpu?
• Sut gallwch chi hyrwyddo eich cynhyrchion yn ddigidol?

Fel rhan o'r sesiynau, byddwch yn derbyn templedi, rhestrau gwirio, a recordiadau i'ch helpu i roi eich dysgu ar waith.

Yn rhan o'r rhaglen, treialodd Croeso Cymru hefyd gynllun mentora busnes un‑i‑un gyda nifer fach o fusnesau twristiaeth yng Nghymru. Rydyn ni'n gobeithio cynnal y rhaglen hon eto yn y dyfodol. Os hoffech fod ar y rhestr aros i glywed gyntaf am unrhyw gyfleoedd eraill, ac i gael eich ystyried, cwblhewch a chyflwyno’r Ffurflen Gais ar-lein.

I fod yn gymwys i wneud cais bydd angen i chi fod wedi mynychu neu wylio'r tair sesiwn hyfforddi ar-lein. Bydd ceisiadau yn cael eu hystyried yn erbyn meini prawf penodol.